Edhe pse Bashkimi Europian vendosi të reduktojë importet e naftës ruse me 90% deri në fund të vitit, Italia është bërë vendi i vetëm në Europë që e ka rritur atë.

Me qëllim të ndëshkimit të Rusisë për pushtimin e Ukrainës, embargoja e naftës në BE tani po vë në rrezik një nga rafineritë më të mëdha të Italisë, të vendosura në Siçili, e cila do t’i jepte një goditje ekonomike rajonit, shkruan AP, transmeton portal arbresh.info

Italia ra dakord me partnerët e saj të BE-së për të shkurtuar importet e naftës së papërpunuar ruse deri në vitin 2023, një lëvizje që kryeministri Mario Draghi e quajti “një sukses të plotë”, që “vetëm disa ditë më parë nuk do të kishte qenë i besueshëm”.

Por, Roma duhet të merret edhe me fatin e rafinerisë në Siçili në pronësi të Lukoil të Rusisë. Si rezultat i sanksioneve të mëparshme kundër Rusisë, ISAB Srl ka kaluar në mënyrë paradoksale nga përpunimi i 15% të naftës së papërpunuar ruse në 100%.

Kjo për shkak se bankat kanë refuzuar të marrin rrezikun e dhënies së kredisë për ISAB të kontrolluar nga Rusia që do ta lejonte atë të blejë naftë nga burime jo ruse, edhe nëse nuk ndalohet në mënyrë specifike ta bëjë këtë, tha Matteo Villa, një analist energjetik në Milano.

“Italia është i vetmi vend në Europë që ka rritur importet e naftës”, tha Villa, duke u kthyer nga importuesi i gjashtë më i madh i naftës ruse në më të madhin në tre muajt që nga pushtimi.

Fabrika punëson 3,500 njerëz në tre lokacione prodhimi, duke përfshirë një rafineri, gazifikimin dhe centralin e kogjenerimit të energjisë elektrike, në provincën e Sirakuzës të Siçilisë, dhe rrezikon mbylljen nëse nuk gjendet një zgjidhje përpara se të fillojë embargoja.

E ardhmja e rafinerisë ishte tashmë në rrezik në terma afatgjatë, për shkak të tranzicionit energjetik të Italisë drejt burimeve më të qëndrueshme. Embargoja vetëm sa ka rritur ndjenjën e urgjencës për të gjetur një zgjidhje.

Si një rafineri me pronësi italiane, ISAB do të jetë në gjendje të marrë financimin e nevojshëm për të blerë naftën e papërpunuar nga burime të tjera dhe të vazhdojë të funksionojë ndërkohë që kërkohen zgjidhje afatgjata.

“Kjo është e rëndësishme për punësimin në Siçili, për furnizimin me benzinë ​​dhe naftë në Itali dhe për kursimin tonë politik në Europë”, tha Villa./AP/arbresh.info/